المساعد الشخصي الرقمي

مشاهدة النسخة كاملة : كلمات أغاني الشايقية


د.ن.ق.ل.ا.و.ي
07-09-2007, 09:19 PM
في هذا البوست انشاء الله بنقوم بنقل وكتابة جميع كلمات وشعر الشايقية ... فالنبدأ بأغنية::

لا تنجع.....

للشاعر خالاد شقوري - (غناء: محمد النصري)

يا الشايل شمسك في جواك خليها تبين للناس تطلع
يا النازع فرحة والدة هناك غير حس آهاتك ما بتسمع
******
يا الناسي اللبقة المفتوحة دي بلاك طوريتك ما بتقرع
المنجل في راس التمرة ناسيهو وامك ما بتطلع
الكتقة وقعت والحملان في اللوبي بقت تجري وترتع
والزير الفي بيت الضيفان حرمان لا نزّ ولا نقع
******
يا السبت عقابك وروحت وحيات عز بلدك لا تنجع
الشتلة تقولك لاتنجع الواطة تقولك لا تنجع
الحوض الما رفعت سرابو ينادي يقولك لا تنجع
الحبل الما تميت وسيرو يهاتي يقولك لا تنجع
والنيل الفي واطاتنا ترع بيقولك ازرع ولا تنجع
******
ماك فاكر يوم داير ترحل وابوك الحاج شايلو عصا
لا حيلو وقف طقش الابريق اندفق سال فوق المصلاة
قام بارى الحيطة واتوكل ويقوم فد مرة ومية يقع
ويقولك يا المبروك ارجع
******
ارجع ارجع يا زول ارجع غير ارضك عاد ما بتلقى بطاح
شن داير في بلدا والناس ما فيهن حاس وما فيها صباح
الليل الويل مليان اتراح الويل الليل مليان اتراح
بياع بيقول افراح افراح زي البيقول تفاح تفاح
******
مجلوبة الفرحة ومفروشة من ضحك الناس دايرين ارباح
لو كان في ايدن ملك الكون كان لمّو عبير الزهر الفاح
كان علمو نفس الزول العاش في سدر الليل داير يرتاح
كان حجزوا الغيم في واطاتو وكان آمسكين باعو الارواح
******
وين تلقى الفرحة وتتهنى في دارا ضيقي ومافي براح
جم ناسا من عين العطشان تخطف ومضات البرق اللاح
******
سايب اهلك ونخلك راحل قول وين ماشي وين آ صاح
الشمس النايري ابت تطلع النيل يا زول اصبح رحراح
الضل قصر ما غتى رويس ولدا ساكب عرق الكتاح
الواطة ابت تديك الخير ولا انت عليك ما هابي رياح
******
قولي وين ماشي ووين غاشي ولي شن سايب بلد الصلاح
النسمة ان جاتك بتجيك ملياني عبير عند الفياح
الموية ان داير تلقاها نقاعا واطيب من الراح
ان درت نغيم الموج تلقى وان درت كمان الطير صداح
******
ارجع ارجع يا زول ارجع
الضحكة هناك من جوة الجوف الفرحة هناك ما فيها الخوف
الشقى ارحم في ضل النيم وبعيد من ناسا واقفة صفوف
جم ناس حبان تلقى المكسور مشيول في كتاف واحد مكفوف
الجن الاحمر فاقد الحيل في خلوة حاج الخير مكتوف
دكان الشيخ فوق الواطة كيمان كيمان ما فيهو رفوف

د.ن.ق.ل.ا.و.ي
07-09-2007, 09:33 PM
ناقش الاحساس
عبدالله التاج







يــــا نــاقــش الا حــســاس عــلــي وتـــــر الــنـــدم

هـيــج سـوالــف الـذكـريـات كــبــت مـنـابــع الاه دم

يـاراسـم الـحـزن الدفـيـن فــي ظــل تجاعـيـد الالـــم

اخفيت معالم البسمه وين اديـت ملامـح الصـوره هـم

الصادي من حس الخايـل الجـاي بـي واقعـو اصتـدم

مـا بينـي مـا بيـنـك مــدار قــدر سنـيـن ترحـالـو كــم

لو انت موصوف با لضيـاء دافـر ظـلام ليلـي الهجـم

انا ذاتي معـروف بالشمـوخ احساسـي يلصـف بالقيـم

لاك دار تلوج مـن كبريـاك تدينـي راس خيـط العشـم

ولا لي جناح انا شان اجيك خلقوني من حظي السجم

يـا وحـي الهامـي وغنـاي احيـت رفاتـي مــن الـعـدم

مـا بيـن جـدار قلبـي الجريـح متوهـط اهــداب الكـيـم

اعزرني لو صعب الوصـال اعرفنـي محكـوم بالقـدم

كيفـن بجيـك وانـا فـي البيـوت لقيانـا متـروك للقـسـم



..............

وهاك دي عشانك يا سوار::

يا شمات كفاية البي جنّي قواسم اتلمت
جارن بالتجني علي سدن حلقي بالعبرات
كفـــــــاية،،،
ياخلاي وينكم لي لقلبي النزف دمعات
ياما غنى قال احي وفرحت بي غنى الشمات
جراحك ما بتطيب بالكي وياما انطبقن كيات
ياشمـــــات،،،
متين ظلم الاحبة يروح وتشهد بي فنا الايام
عشان زيك كتير مجروح شان البيك من آلام
طولت في العذاب والنوح صدن منك الاحلام
ماك قادر تقول وتبوح دموعك ياما فيها كلام
سامعك في جواي والروح تردد كل شي اقسام
كفـــاية،،،
كفاك يا قلبي ديل شمات راجنك متين تشكي
دايرنك تقاسي الفات اوعك تاني لا تبكي
اسكت واكتم العبرات في جواك قول واحكي
امحى الماضي بالجايات يجيك غصن الفرح متكي
اوعك تاني تنعي المات وللشمات تكون ضحكي
ياشمات كفاية البي،،،
اكيد غيم المحنة يجود ما فاد النواح الآه
اوعك تاني ليهو تعود اخير لك كابد المنفاه
كفاية الشفتو في المريود دا فرج فيك خلق الله
خلاص خليهو للمعبود هو ساير في درب تواه
كفــــاية،،،

..........
حزن الحراز


هل جارت الايام عليه ولا ادلق عطش السنين خلاهو كرهان الرزاز
حزن الحراز،،،
ما بينو ما بين الغمام زاد الجفا ودام الخصام
شوقر عروقو من المحل خدر من الشقى كل عام
لا فرهد اوراقو الخريف لا ركّ قمري ولا حمام
عاشق سفر طير الرها عبر المسافة بلا جواز
حزن الحراز،،،
دايما ينادي من البعيد سرب المعزات اللي فات
سر الهوى المزروف دموع آلامو في الحيا والممات
احرق معاناتك شموع ارميها ضد الريح رفات
والساكنة عمقك زكريات واريها في صي المفاز
حزن الحراز،،،
قول لي يا رويان عطش ليه انت حبيت الجفاف
عقرب معاناتك دوام تدميك بي مر الزعاف
شايفك يبكيك النضار عارفك من الامطار تخاف
لكن بشيل الحيرة ليه لي كل قاعدة اكيد شواذ
حزن الحراز،،،
افرح اذا ما الليل دخل طرد الشعاع من النهار
بوخ من العتمور سموم تلفح مياسم الزهرة نار
العن محطات الامل اسرق من النيل المحار
علم دواير الهم تدور لوليها محور ارتكاز
حزن الحراز،،،

****


الامل الرحل

يا فرحة في بحر السراب
يا كلمة في أول جواب
يا واحة في ليل الصعاب
يا خيط شعاع وسط الضباب
يا نجم من دنيانا غاب
يا أغلى ما تحت التراب
من خلفي قضبان العذاب
ليك برسل الآهات خطاب

يا يمة يا الأمل الرحل
قبال يقول كلمة وداع
يمة يا النور الخفت
قبال يرسل خيط شعاع
يمة يا دمعة فطيم
خلوهو لي ليل الضياع
يمة يا مركب نجاة
غرقت قبل تفرد شراع
يمة يا نجمات صباح
مرن سراع مرن سراع

يا يمة من بعدك أنا
أصبحت للأحزان وطن
دروشت في خلوة أساي
سبحت بي خرز المحن
كتحت صبري أنا للرياح
غنيت للأحزان بكن
دقيت باب الذكريات
كان ألقا لي هناك سكن
لا لقيت صورتك في الخيال
لا شفت من بعدك زمن
ودرت لي درب الرجوع
كل المعالم إختفن

فتشت في كل البلاد
كان ألقا لي طيبتك مثيل
دورت في كل البقاع
شايل عذاب ليلاً طويل
زادي الوحيد كان الصبر
في الظلمة والزمن العليل
زمناً يشيل حق الضعيف
يديهو لي عابر سبيل
زمناً يغير كل شئ
حتى الزمان كان مستحيل

يا يمة كيف يتبلّ شوق
والشوق على كل يوم يزيد
لا إنتي بنتي ولا هو راح
لا غيرو الزمن المديد

يمة من بعدك لا فرح طلانا
لا ضمانا عيد
غير خيط فرح يبدا ويروح
كل ما أقول يا داك فرح
ألقاهو مني بعيد بعيد

لكني راجع ليك أنا
بالرغم من كل المحال
جاييك عشان أعرف خطاي
من وين تستف للرحال
جاييكي لو كان مستحيل
جاييكي لو كان في الخيال
لاقيني لو كان في الحُلم
ما الدنيا من بعدك زوال
عنواني خلف اللاوجود
يا أُمي يا أبعد منال

والجديد جاي ورا
وتقبلوا تحياتي

سوار
08-09-2007, 10:52 AM
دنقلاوي انت بالجد مبدع ..... والله مبدع .....
جيب اضانك وتعال لي جاي ...... (( حلفتك بالله لو عندك اي قصيدة غناها الفنان الرائع محمد النصري تواصل في هذا الابداع مع تعريف شاعر القصيدة .... حتعجبني شديد طبعاً يا جنا يا شفت .....)) ..
هذا مع تحياتي الخاصة جداً اخي الرائع دنقلاوي ،،،،

محمد زهير
08-09-2007, 11:03 AM
جزاكم الله خيرا

د.ن.ق.ل.ا.و.ي
08-09-2007, 09:42 PM
سوقني معاك يا حمام - حميد

--------------------------------------------------------------------------------

سوقنى معاك يا حمام
سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
سوقني محل ماالمحنة
وأيادي تقطر سلام
سماحة الحياة فوق أهلنا
وبلادي تقرقر وئام
غلابه وأمان مو الطيابة
ضكارى بصارى وكرام
حبابه الحبان في بابه
وتدخلوا عليّ الحرام
فقارى ولكن غنايا
غنايا بهذا الغمام
بهذا النيل كم تغايا
وتيرابا نرميهو قام
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
ولِيد مخلوق للقراية
خزين مدخور للجِسام
تتمر نيتو التخاية
إلاما مذهلل إلام
درب من دم ماب يودي
حرِب سُبّه .. حرب حرام
تشيل وتشيل مابِ تدِّي
عُقب آخرتا إنهزام
بطانة الشيطان قديمِة
وبعد دا منو العرشو دام
إذا الإنسان ما ليهُ قيمِة
علي إيش خلَّفُو سام وحام
تعالوا الدم ما هو مويةِ
ولا ها ترايي المسام
أخويا وطراوة الخوة إبتسام
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
بساط أحمدي كم يشيلنا
وتشهِّلنا على الدوام
نَقِل ليلنا تقوِّي حيلنا
ودليلنا تمام التمام
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام
ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
فلاحة العالم تعمر
محبّة مودة ووئام
تشمِّر ساعد السلام
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام


*************************


قررتي تسافري:::::

يعنى خلا ص قررتى تسافرى تنزعى فرحك من جواى
آيـه قـولـيـلـى وراك فـاضـلـى لـما يغيب قمرى الضواى

يـاتـو طـريـق يـهديك الرجعه ويدى مسافة السكة خطاى
ويـاتـو دمـوع تـكفيـنى انوحك مهما يطول يا غاليه بكاى
بـحـر الـدنـيــا الـهـائـج فـيـهـو تـايـهى مراكبى بلا هداى
وانـتـا حـيـاتـك يـاهـا حـيـاتـى كـيـفـن اقـدر اعيشه براى

انـتى مـنـاهـل عـشـقـى الـصـافى لما تفيض تغمر دنياى
وانتى معانى العشق الزاهى وانت منامى وانتى صحاى
لـمـن تـرحـلـى يـا مـحـبـوبـه بـتمـشى جيوش الهم تالاى
تـهــزم صـبـري الداخرو عشانك دنيا فداها نزفت دماى

أيـوه بـريـدك مـن اعـمــاقـى انـتـى حـيــاتـى وكـل مناى
شـلـتـك فـى احـسـاسـى مـعـانى انـصـاغـت بلحـن غناى
عـشـتـك فـرحـة وروعه وبسمه وما خليتك لحظة وراى
وحـتى الـقـمـرى الأحـزنوا بعدك رددوا ليك مع القوقاى

رسـلـى طـيـفـك لـى يـواسـى لـمـا تـعـودى تـقـبـلى جاى
يـاهـو واحـاتـك لـمـا تـغـيـبي بيـبـقي انيسى ويبقى عذاى
بـلـغـى دارك عـنـى تـحـايـا قـدر الـشـوق الـبـاقـى معاى
كـم نــاديــت لـطـيــفــك يـرجـع إلا ارتـدا عـلـيّ صـداى

شـيـلـى هـواى فـى دربـك زادك يـلا اتـكلى على مولاى
الله يـسـهـل لـيـك طـريـقـك لـيـهـو إلـهـى رفـعــتــا يداى
والأشــواق الــدامــت بـيــنـا لـيـك مـرسـالـى مع الهبباى
ومـا بـنـسـاهـو الـحـسـن الـودر بـى طـلـت عينيك شقاى

سوار
08-09-2007, 10:54 PM
حزن الحراز،،،
دايما ينادي من البعيد سرب المعزات اللي فات
سر الهوى المزروف دموع آلامو في الحيا والممات
احرق معاناتك شموع ارميها ضد الريح رفات
والساكنة عمقك زكريات واريها في صي المفاز
حزن الحراز،،،
قول لي يا رويان عطش ليه انت حبيت الجفاف
عقرب معاناتك دوام تدميك بي مر الزعاف
شايفك يبكيك النضار عارفك من الامطار تخاف
لكن بشيل الحيرة ليه لي كل قاعدة اكيد شواذ
حزن الحراز،،،
****************************************
د.ن.ق.ل.ا.و.ي ........ الله يخليك لينا يارب ...

تحيااااااااااااااااااااااااااااااااااااااااااااااا ااااااتي وحبي ،،،،

د.ن.ق.ل.ا.و.ي
09-09-2007, 10:50 AM
آآآآآآآآآآآمين ... ويخليك لينا يا سوار وعشان مروركم الرائع أهديكم تاني ::

مرام الطفلة البريئة التي اغتصبتها الذئالب البشرية
في اول ايام عيد الفطر المبارك
قال فيها الشاعر الكبير حاتم حسن الدابي هذه القصيدة:-

*******
مرام مرقت على الجيران
ومرن ديل كم ساعات
غابت نجمة الضيفان
واكتست الارض ظلمات
مرام ما جات…!!
حكاية كان وياما كان
حكاية تشيب الولدان
حيرت الانس والجان
وبرهنت انو ما في امان
رجع وأد الطفولة زمان
زمن عبدة(هبل)و(اللات)
بعد لبست جديد في جديد
مرام مرقت تبارك العيد
وقفت سمعتنا نشيد
حلاوة موبايلا الفي الايد
مع التسريحة والباندات
اتاريهو الغدر منصوب
مسطر ومافي منو هروب
برغم رضانا بالمكتوب
ده غدر ما وراهو سكات
بدون إنزار..بدون اسباب
مرام غدروها جمب الباب
مرام هجمت عليها ذئاب
طباعم من شريعة الغاب
ملاكاً حولوهو رفات
قلوب لا رحمة لاإحسان
مدبجة بي صفات شيطان
وظهرت قدرة الرحمن
محل اسنانها هو الاثبات
دريبها على الارض منقوش
سريرها من العصر مفروش
معالمو باقية وسط الحوش
ملابس الروضة واللبسات
بعد شمس العصاري تغيب
مرام كانت تودي تجيب
عندها بسكويت وحليب
في تلاجتن راقدات
وحيدة اخوانا والوالدين
عليها يخافو متمنين
تتعلم تتم الدين
وليها يوزعوا الشربات
*******
يا صاحباتها وينها مرام
سماح يادوبو فرهد قام
عمير ما تم خمسة اعوام
ملازماها البراءة سمات
عيال الروضة ياسمحين
لمن جيتو متماسكين
ما شفتوها راحت وين
مرام سرقت منام العين
مرام حرقت حشا الامات
وليه بتقول مرام ما جات
*******
مرام كلما وجيها يلوح
تبق جوانا احساسات
مرام بقت القلب والروح
سحابة تخدر البلدات
مرام غصة حلق مجروح
تقوقيها القميريات
مرام صفحة كتاب مفتوح
يقروه الطلبة والطالبات
مرام عصفور يئن مجروح
ما شفعها الدمعات
مرام جزء من (محمد) و(نوح)
و(تبارك) و(عم) و(النازعات)
مرام شربت محاية ولوح
وفي ساعة المغيب بخرات
مرام دعاء للجميع مسموح
بعد ما تكمل الصلوات
مرام حاتظل سؤال مطروح
جوه بيوتنا والطرقات
مرام حاتظل سؤال مطروح
وسط اولادنا في الجامعات
مرام حاتظل سؤال مطروح
موجه للشباب بالذات
وليه بدت السماحة تروح
إرث اجدادنا والعادات
*******
اخيرا داير اجيز القول
منو المسؤول..؟؟!!
تقول دي ثقافة البتر
ولا سيف العولمة المجهول
الدجتل مع المحمول
افلام فاضحة والمسكول
عموماً…….
بيوتنا في فك غول
مخيف اسموا الفضائيات
ومرام ما جات..!!


**********


لسان الحال

معذرة.. لو معاك منى الكلام حـــــره .. معليش الخطاب كاتباهــــــو مضطرة
حـــــــــــرام والله مننـــا إنت تتبرا .. خمسة سنين تفوت تجى فيها فد مرة
وراك أنا كم شقيت وعشت فى مرة .. وتعبـــت مع البطان الهم للعيون غرة
بيخاف الغرق الغاص ورا درة .. قالو أدب الصغار والعقــــدة من خدرة
حليلى أنا الزمن ضى فاطرى ما انفر .. وخمسة سنين غياب مابتحملن حرة
أنا الحاضنة العذاب وآمالى محتضرة.. وإنت الفى النعيم ما خات حساب بكرة
مسكينة التقول فى الإغتراب سترة .. وتتناسى القروش فى يوم تكون ضرة
حليل زمنك وكت عايشنا بالأُجــرة .. يا ريــــت لا عرفـــــــت ولا مرق برة
**********

الكاتما فى جواى كتير متملك الجوف والعصـب.... وما كت دايرة أقولو ليـك لكن لسان الحال غلـب

ما بنسى يـوم ودعتـنا وسافـرت فى غـرة رجـب. ...خلـيت وراك الـدار حـزين يتباكـا والدمع انسكـب

أعذرنى والله العظيـم لو ما الضـرورة أنا ما كـتب.... وأنا خايفـة فى بعـدك يكون الضاع هو ضعف المكتسـب

اليومـة داك ناس البلـــد هنونى شايقيــــــى وعرب.... قالو لى مبروك خير وجاك يكتب سلامــــتو الإغــترب

قالو لى دوب نجم السعد طلاكى من بعـــــد إحتجــب.... يا دوبا بالك يستريح وتنسى العـــــــذابات والتعــــب

فضّلت أحسب فى الشهور قاعدالى فوق نيران لهــب.... صابرة وحريصة على العيال لا بيقو للريح فى المهـب

سديت خانتك مــن مشيت قايمـابو واجبــــى كأم وأب....والأســــرة يضنيها المسير .. وتتهاوى لو ما فيها رب

والله ما بنــــكر جميلك برضـــــــــو لينا ثناك وجب.... موكب هداياك ما انقطع .. كان سترة فى الزمـن الصعب

لابسين وماكلين والنعيم كايلنا فى يوم ما نضب .....وعايشين معيشــــــــــــة المترفين .. طولنا والطبع إتخرب

البيت مفرش بالحرير ومليانة إيدى بالدهب.... لكن خسارة على محل .. عاش سيدو خمســــــــــة سنين عزب

الشى المهم ما قلتو ليك وليهو إنت ما ظنيت حسب.... كبرو الصغيرونين خلاص .. خايفالم الطبــــــــــع الكعب

وصولوها مرحلة الخطر .. والأمن ما زال مستتب.... وانا كتّ قادراهم زمان لكـــــــــــــن بعد كبــــــرو اتغلب

حصلنى قبل الجد يفوت .. دوبنهم فوق العتب.... قبال نحصـــــــــــــــد الخير ندم .. ومابيجدى كان لمت وعتب

خايفالم الطيش فى الدروس .. ومابرضى لو واحد رسب.... خوفنى المتعبنى الكبيـــــــــر بعدين يمرقو بلا أدب

وريتك الحاصل على لا فيهو ثورة ولا غضب ....شان الحديث مايبقى نى .. والواحــــــــــــــــــة يكتنفا الجدب

أنا قلبى مازال لسة حى .. ونجمو الملاهج ماغرب..... وآخر كلامى ترد على .. لا أبقة بكـــــــــــــرة أنا السبب


ما كنت دايــــرة اقولو ليك .. لكن لسان الحال غلب ..

**********

حال اللسان

.. رد المغتـرب..

أنا ما كنت داير الاغتراب .. لكني مجبور ابتعدت
حسيت متل غمز الحراب... وفي أنه الصبر النكد
أرجع وأقول إنتي السبب..
قلتيها لي ما بترضي بي عيشة وسط
دايرها فوق عيشة رغد
قاريهو في عيون الصغار.. طلباتم الما ليها حد
حسيتو في عيناك سؤال احترت ما لاقيلو رد
نظراتك الحادة النبال.. سيطان بتلهب في الجسد
وانا كنت صابر زي بلال كان ردي ليها أحد.. أحد
**

الكاتمو في جواي كتير من حرقتو الجوف اتهرد
ما كنت قاصد أقولو ليك لكن لسان الحال سرد
ما بنسى يوم ودعتكم وبي حسرة غادرت البلد
ختيت على جرح الفؤاد .. فُرق البيات والولد
ما اعتدت أفارق للصغار.. والوجعة فرق الفي المهد
زفر القليب آهات حزان.. حسيتبو جواي ارتعدت
كان انتي شوقك لي بحر.. كيفني انا المكتول كمد
خليت لك الروح والقلب.. سافرت بي باقي الجسد

عارفك حريصة على العيال.. فوقك بعد الله اعتمدت
في الحارة تسوي لك رجال .. للمايلة والمحتاج سند

اتغشن القالن وراي.. هلن لي نجمات السعد
ما اتغربن وضاقن معاي ..مر عيشة الهم والنكد

لو عني كررتي السؤال ..أنا بني وبين الفرحة سد
سهّيت وغايتو علي حال .. يعلمو الفرد الصمد

عزّابي في قاطوع صغير.. في ضيقو زي ود الأحد
في السوق صباحات الله خير .. حايم وازازي بلا غرض

الزي بيهو الليل يطول.. يتقلى فوق جمرو الوقد
اتوقعي البجي ليك يقول.. في الغربة محبوبك فقد

البي ده ما بيغباهو زول.. يحكيهو طرفي الما غمد
سنتين افتش في كفيل.. لي حالي فد زول ما نشد

في التالتة رب العزة قال.. حامدنو حلال العقد
مكتب ولا كان في الخيال .. في الفارهـ الدور قعدت

عربية والراتب كبير.. ورابطلي خرزة من الحسد
بليت عروق قلبي المرير.. عِزة ورفاهية وسعد

لكني يا حظي التعيس.. تميتلي شهرين واترفدت
قالوا الوظيفة اتعممت.. محجوزة لي أهل البلد

شوفي الضرايب فوقي كم .. كان جيت أفكر في البلد
وزي الكلام ده يزيدني هم .. ويرفع لي إفراز الغدد

قوليها لا تهابي الحروف.. كان في غيابي الشوق برد
البي ده كلو من الظروف.. والله ما لي فيهو يد

اليبقى في فرش الحرير.. ماخدنو من فك الأسد
بي ضحكة في ابواب جحيم.. لي دمعة اتبلابه خد..

أنا شان رضاك أرحل بعيد.. لي غربة لي دمعة وسهد
وأنا فيها ساهي البال شريد.. أفكاري فيكم وفي البلد

سامحيني لا تابعي الظنون..ما زلنا بيناتنا الوعد
والغربة من أجلك تهون .. وطعم العذاب يصبح شهد

جوابك الظاهرو الوداد.. كاتباهو بي دمع الحرد
يجي ردو في نفس المعاد.. نتلاقى طيارة الأحد

الكاتمو في جواي كتير من حرقتو الجوف اتهرد
ما كنت قاصد أقولو ليك لكن لسان الحال سرد

الصادق بنا
09-09-2007, 11:25 AM
اشكرايادنقلاوي والله رائع وبنشكرك تاني وثالث ورابع ..................

د.ن.ق.ل.ا.و.ي
09-09-2007, 11:58 AM
مروركم عطر البوست

سوار
09-09-2007, 11:19 PM
دوماً عزيزي ( د.ن.ق.ل.ا.و.ي ) انت والروعة والجمال متلازمان .......
لك مني تحية وحب واحترام ......

خاطرك ،،،،،،،،،،،،،،،،،،،،،،

د.ن.ق.ل.ا.و.ي
10-09-2007, 11:26 AM
رايكم شنو تسمعوها ونواصل:


لاتنجع:
http://www.alnsri.com/grmake/la_tnga.mp3



ياناقش الاحساس:
http://www.alnsri.com/grmake/alehsas.mp3


أسمعوا ديل وانتظروني....